FILIPPO ZIZZO – Sennu Nicu –
Marsala -1791-1864
——–
Ieu sennu nicu a li panni ‘nfasciatu
Ripensu li carizii ch’avia
Quantu fu di li donni rispittatu.
Anciula sempri ‘mrazza mi tinia
Di Catarina nun mi bastu a diri
Pri quantu fu l’amuri chi m’avia.
Francisca spissu mi vinia a vidiri
Pri accidenti chiancia mi cunurtava
Strittu a lu pettu mi facia durmiri
Venira chi di mia s’innamurava
Nunzia ,Betta, Paula e Mattia
Ognuna a lu so lettu mi curcava
Brigida, Lisciannina e Rusulia
Lasciavanu a la casa lu chiffari
Cu gran primura pri vidiri a mia.
Di Serafina nun mi bastu a cuntari
Quantu fu lu so amuri, lu so affettu,
Nun facia autru ch’a mia abbenemiari.
Di Maruzza lu so gran rispettu
Dicennu figgi miu di l’arma mia,
Poi m’abbrazzava e mi stringia a lu pettu.
Di Giulia tantu fu la giulusia
Quantu ‘Ntunicchia di mia si priava
Sempri dicennu dunamilla a mia.
‘Nzula chi pri mia sempri all’erta stava
Ch’era ‘nta lu curtigghiu cunvicina
Quannu mi sintia chiangiri vulava.
Curria ancora Maricchia Peppa e Nina
‘Nsemi dicennu figgi miu ch’avisti
Figghiu di lu mè pettu si la vina.
Figghiu di quannu a la lucina sciti
Sempri stesi cu tia, mai ti muddrai
Finu a li novi jorna chi cumpisti.
Figghiu pri novi notti un mi curcai
Sempri vardannu su visu splinnenti
Mi scurdava l’affanni peni e guai
Figghiu a siri cu tia stava cuntenti
Ch’eri com’un garofanu sciuritu
Anzi comu lu suli risplinnenti.
Figghiu di tia un mi pozzu alluntanari
Ci starria tuttu tempu essennu ‘nvita
Di tia figgi ‘un mi pozzu dispisari.
Poi vinni Tresa Rusaria e Vita
Ciccia Filippa maritati e schetti
Fui di tutti donni calamita.
Purtaru ognunu li so fazzoletti
Chini di cosi duci arraffi nati
Di mustazzoli pastizzi e cunfetti.
E dannuni dri cosi ‘nzuccarati
Dicianu figgi meu, si bravu oggettu
Di tia ristamu tutti cunsulati.
Ora chi granni su, portu suspettu
Chi sugnu di li donni abbannunatu
Mi lu persiru tutti lu rispettu
Su a tali signu mischinu arrivatu
Tantu chi si ci vaiu pri parlari
Si votanu la faccia di dru latu
Sta pena nun la pozzu addulurari
Nicu fui di li donni lu gran spassu
E granni nun mi vonnu chiù guardari.
Cerca ogni donna di mia stari arrassu
Si pir sorti mi scontrano a la strada
Vagghiardu sinni vannu a longu passu.
Comu iu fussi Orlannu cu la spata
Chi sunnu tutti chini di paura
Pri mia nun c’è nudda donna amuriggiata
O donni ‘ngrati la vostra primura
Ch’avivi tantu a la mia picciuttanza
Chi p’abbrazzari a mia nun vidivu l’ura
Ed ora tutti chini di paura.
Comu iu fussi lu vostru nimicu
M’abbannunati ‘mezzu a quattru mura
Senza pinsari chiù l’amuri anticu.